“COP29: Azərbaycanın iqlim hərəkatı təşəbbüsləri” adlı layihə çərçivəsində Abşeron Milli Parkına infotur təşkil olundu

“Gənclərə Qayğı” İctimai Birliyi, “Gənclərin Töhfəsi” İctimai Birliyi və “Psixoloji İnkişaf və Maarifləndirməyə Dəstək” İctimai Birliyinin birgə təşkilatçılığı ilə Azərbaycan Respublikası Ekologiya və Təbii Sərvətlər Nazirliyi və Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin birgə QHT-lər üçün elan etdiyi “COP29-la bağlı beynəlxalq təşəbbüslər” müsabiqəsinin “COP29: Azərbaycanın iqlim hərəkatı təşəbbüsləri” adlı layihəsi çərçivəsində Azərbaycan Dövlət İqtisad Universitetinin nəzdində Qida Sənayesi Kollecinin və 1 saylı Bakı Tibbi Kollecinin bir qrup tələbələrinin Abşeron Milli Parkına infoturu təşkil edildi.
Bu infoturun məqsədi tələbələrə Azərbaycanın milli parklarının biomüxtəlifliyi, ekosistemin qorunması, təbiətin dəyəri və ətraf mühitin mühafizəsi ilə bağlı biliklər vermək, onların milli parklara olan marağını artırmaq və təbiət irsimizin gələcək nəsillərə ötürülməsində onların fəal iştirakını təmin etməkdir. Eyni zamanda, tələbələrin ətraf mühit və ekoloji maarifləndirmə sahəsində biliklərinin artırılması, milli parkların əhəmiyyəti və təbiətimizin zənginliyi barədə məlumatların geniş kütləyə çatdırılması məqsədi daşıyır.
Tədbiri giriş sözü ilə Abşeron Milli Parkının rəhbəri Etibar İbrahimov açaraq milli parkların Azərbaycanın təbiət sərvəti olduğunu vurğuladı. O, bu cür infoturların gənclər arasında parkların vəhşi təbiətinin qorunması və ətraf mühitin mühafizəsi sahəsində daha çox bilik əldə etmələrinə şərait yaratdığını bildirdi.
“Gənclərə Qayğı” İctimai Birliyinin layihə rəhbəri və Qida Təhlükəsizliyi Hərəkatının rəhbəri Məhsəti Hüseynova çıxışında layihənin əhəmiyyətinə toxunaraq bildirdi ki, ekoloji maarifləndirmə yalnız bu cür infoturlar vasitəsilə geniş yayıla bilər. O, tələbələrin ətraf mühitlə bağlı biliklərinin artırılmasının gələcəkdə onların sağlam və ekoloji düşüncəyə sahib vətəndaşlar kimi yetişməsində əhəmiyyətli rol oynayacağını vurğuladı.
Gənclərin Töhfəsi İctimai Birliyinin sədri Asim Vəliyev gənclərin ekoloji maarifləndirilməsi və təbiətə qayğıkeş münasibət aşılanmasının gələcək nəsillər üçün zəruri olduğunu qeyd etdi. O, gənclərin bu kimi layihələrdə iştirakı ilə həm fərdi, həm də ictimai məsuliyyət hisslərinin artacağına əmin olduğunu bildirdi.
Psixoloji İnkişaf və Maarifləndirməyə Dəstək İctimai Birliyin sədri Kamil Həmidov çıxışında dövlətin gənclər siyasətində ekoloji maarifləndirmənin xüsusi yer tutduğunu bildirdi. O, belə tədbirlərin gənclərin sosial şüurunu və ekoloji biliklərini inkişaf etdirməkdə mühüm rol oynadığını qeyd etdi.
Nəzərinizə çatdırırıq ki, layihə çərçivəsində Samur-Yalama, Altıağac və Şirvan milli parklarına növbəti səfərlər, Bakı və Naxçıvan şəhərlərində forumlar, universitet tələbələri ilə görüş və COP29 Yaşıl zonasında xarici ekspertlərin iştirakı ilə təqdimatlar həyata keçiriləcək.