Milli və Vətən Müharibəsi qəhrəmanları adından da AŞPA-ya etiraz edildi – Bəyanat
Azərbaycan Respublikası Milli Qəhrəmanlarını Tanıtma İctimai Birliyi 203 Şəhid Milli Qəhrəman ailəsi, 15 Sağ Milli Qəhrəman, 34 Şəhid Vətən Müharibəsi Qəhrəman ailəsi və 54 Sağ Vətən Müharibəsi Qəhrəmanları adından son günlər Avropa qurumlarının ölkəmizə qarşı yol verdiyi qərəzli münasibətlə bağlı Bəyanatla çıxış edib. Həmin bəyanatın mətnini olduğu kimi təqdim edirik:
“AŞPA-nın yanvarın 22-də, qış yarım sessiyasının açılış günündə ölkəmizin bu təşkilatda nümayəndə heyətinin etimadnamələrinin təsdiq edilməməsi Azərbaycana qarşı açıq-aşkar ikili standartlar siyasətinin tətbiqinə cəhd kimi dəyərləndirilməlidir.
Azərbaycanda fevralın 7-də keçiriləcək seçkiləri müşayiət etməyə AŞPA-nın dəvət edilməməsi və ölkədə “siyasi məhbus”ların olması ilə əsaslandırmaq cəhdləri yalnız beynəlxalq ictimaiyyəti aldatmaq məqsədi güdür. Hələ ötən il aprelin 23-də Azərbaycan Ermənistan ilə sərhəddə, Laçın-Xankəndi yolunun başlanğıcında sərhəd-buraxılış məntəqəsini qurandan sonra AŞPA dəfələrlə Azərbaycandan həmin sərhəd-buraxılış məntəqəsinin ləğv edilməsini tələb etmişdi. Təbii ki, Azərbaycan mahiyyət etibarı ilə Ermənistandan ölkəmizin ərazisində o zaman hələ mövcud olan qeyri-qanuni erməni silahlı dəstələri üçün canlı qüvvə və silah-sursat daşımasına icazə vermək anlamına gələn bu tələbi qətiyyətlə rədd etdi. Bundan sonra AŞPA rəhbərliyi 3 dəfə ölkəmizə müraciət edərək Laçın yoluna məruzəçi göndərmək istədiyini bildirib. Aydındır ki, bu istəyin də arxasında ermənilərin “blokadada yaşamaları” barədə uydurma faktlar əsasında saxta hesabatların hazırlanması və bu yolla Avropada anti-Azərbaycan əhval-ruhiyyəsinin gücləndirilməsi məqsədi dururdu. Azərbaycan dövləti yenə də prinsipiallıq və siyasi iradə nümayiş etdirərək, bu cəhdlərin də qarşısını aldı.
Son proseslər AŞPA-nın timsalında Avropa Şurasının başqa bir xislətini də ortaya çıxardı. Bir daha bəlli oldu ki, Avropa Şurası müxtəlif Avropa ölkələrinin Avropa Parlamentinə düşə bilməyən islamofob və türkəfob təfəkkürlü nümayəndələrinin düşərgəsidir. AŞPA-nın Azərbaycana qarşı son əsassız, faşist davranışının kökündə də bu amil dayanır.
Xatırlatmaq yerinə düşər ki, Azərbaycan vaxtilə Qarabağ probleminin həllinə sülh yolu ilə nail olmaq üçün Avropa Şurasına üzv olmuşdu. Lakin ötən dövrdə gedən proseslər göstərdi ki, bu qurum Azərbaycanın mənafelərinə xidmət edəcək heç bir layihədə maraqlı deyil. Bu gün isə, artıq Azərbaycan dövləti özü Qarabağ problemini kökündən həll edib. Buna görə də ölkəmizin hazırda nəinki dünya səviyyəsində, Avropanın hüdudları daxilində belə nüfuzu olmayan Avropa Şurasına heç bir ehtiyacı yoxdur.
Xalqımız Prezident, Ali Baş Komandan İlham Əliyevin rəhbərliyi ilə Qarabağı düşməndən azad etdi. 30 ildən sonra müstəqil Azərbaycan dövlətinin ərazi bütövlüyü təmin olundu. Biz bəyanata imza atan şəxslər və təşkilatlar olaraq bir daha bəyan edirik ki, bu cür basqılar bizim dövlətimizin iradəsini sarsılda bilməz. Avropa qurumlarının bu qərəzli mövqeyini kəskin pisləyirik və bütün məsələlərdə olduğu kimi, bu mövzuda da dövlətimizin yanında olduğumuzu bəyan edirik”.
