Qəbələdə TAİB sədrinin 85 illik yubileyinə həsr olunmuş simpozium keçirilib

Bu günlərdə Qəbələ rayonunda Azərbaycan Uroloq və Androloqları Birliyinin ənənəvi XX simpoziumu keçirilib

Agsaqqallar.com xəbər verir ki, Simpozium TAİB-in sədri, akademik Sudeif İmamverdiyevin 85 illik yubileyinə həsr olunub. Simpoziumda 154-dən çox həkimlər iştirak edib. Yubilyarın görüşünə qardaş Türkiyədən də tanınmış professorlar və uroloqlar qatılıb. Maraqlı təqdimatlarla zəngin olan simpozium iki gün davam edib.

Sudeif Bəşir oğlu İmamverdiyev 2 iyul 1938-ci ildə Astara rayonunda anadan olub. Türk Ağsaqqalları Birliyinin sədri, AMEA-nın müxbir üzvü , uroloq, tibb elmləri doktoru, akademikdir. Azərbaycan Respublikasının əməkdar dövlət və elm xadimi, Azərbaycan Tibb Universitetinin urologiya kafedrasının müdiri, məşhur “91”-lər sırasında olaraq Yeni Azərbaycan Partiyasının yaradıcılarından biri, Milli Məclisin sabiq deputatıdır.

Akademik Sudeif İmamverdiyev elm sahəsində göstərdiyi xidmətlərə görə 2000-ci ilin iyun ayında Azərbaycan Respublikasının Prezidentinin fərmanı ilə Şöhrət ordeni ilə təltif edilmişdir. 2006-cı ildə isə elm sahəsində göstərdiyi xidmətlərə görə Y. Məmmədəliyev adına medalla təltif edilmiş, 2008-ci ildə isə əməkdar elm xadimi adına layiq görülmüşdür.

Akademik həmçinin elm sahəsində göstərdiyi xidmətlərə görə 2010-cu ildə Rusiya Təbiət Elmləri Akademiyasının müxbir üzvü secilmiş, Elmi məktəbin yaradıcısı fəxri adına layiq görülmüş və cərrahi urologiyada ixtiraçılıq və səmərələşdirici təklif vermək fəaliyyətinə görə “Nobel” medalı ilə təltif olunmuşdur.