Türkiyəli məşhur iş adamı: “İlham Əliyev Qarabağda həyata keçirilən layihələrə xüsusi həssaslıqla yanaşır
Türk Ağsaqqalları Birliyi – TAİB nümayəndələri Ankarada Türkiyə – Azərbaycan İş Şurasının rəhbəri, Qarabağda böyük layihələr həyata keçirən, Zəfər yolunun inşasında iştirak payı olan məşhur “Kolin İnşaat” Şirkətinin sahibi Kamal Koloğlu ilə görüşüblər.
Görüşdə iş adamı Qarabağdakı quruculuq işlərində iştirak etməkdən qürur duyduqlarını deyib.
Kamal Koloğlu həmçinin Prezident İlham Əliyevin işğaldan azad olunmuş ərazilərdə həyata keçirilən layihələrə xüsusi həssaslıqla yanaşdığını və Qarabağ İqtisadi Rayonunun tez bir zamanda dirçəldilməsi üçün böyük səylər göstərdiyini bildirib.
TAİB həmsədri, tanınmış diplomat Hulusi Kılıçın fəaliyyətindən söz açan iş adamı, onun türk xalqları arasında əlaqələrin inkişafına töhfə verməyə yönəlik çalışmalarını təqdir etdiyini də vurğulayıb.
