TAİB-in sədri Asiya Siyasi Partiyalarının Beynəlxalq Konfransının (ICAPP) “Təhlükəsizlik və əməkdaşlıq: Siyasi partiyaların rolu” mövzusunda keçirilən beynəlxalq konfransda iştirak edib

Bu gün Bakıda Yeni Azərbaycan Partiyasının (YAP) ev sahibliyi ilə Asiya Siyasi Partiyalarının Beynəlxalq Konfransının (ICAPP) “Təhlükəsizlik və əməkdaşlıq: Siyasi partiyaların rolu” mövzusunda xüsusi konfransı keçirilib.

YAP sədrinin müavini – Mərkəz Aparatın rəhbəri Tahir Budaqov konfransda Ermənistanın 30 il ərzində torpaqlarımızı işğal altında saxladığını və Azərbaycanın 2020-ci il sentyabrın 27-də başladığı əks hücumla 44 gün ərzində torpaqlarını azad etdiyini söyləyib.

Tahir Budaqov Ermənistanın hələ də 2020-ci il 10 noyabrda imzalanan üçtərəfli bəyanatın bir sıra müddəalarını yerinə yetirmədiyini nəzərə çatdırıb.

Prezident Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin müdiri Ədalət Vəliyev Azərbaycan Prezidenti İlham Əliyevin konfrans iştirakçılarına müraciətini oxuyub.

ICAPP-ın Daimi Komitəsinin həmsədri, Koreya Respublikasının keçmiş xarici işlər naziri, Milli Assambleyanın ofisinin keçmiş direktoru Chunq Eui-yong Azərbaycanın uğurlu inkişaf yolu keçdiyini bildirib, dünyanın COVID-19 pandemiyası dövründə üzləşdiyi çağırışlar, təhlükəsizliyə təhdidlərdən söz açıb. Onun sözlərinə görə, bütün münaqişələr sülh yolu ilə həll olunmalıdır.

Türkiyə Böyük Millət Məclisinin deputatı Afif Demirkıran deyib ki, siyasi partiyalar təhlükəsizliyi təşviq edə, bu sahədə dialoq apara bilərlər. O, Türkiyənin regionda və dünyada sülhə töhfələrindən danışıb.

Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov Azərbaycanın Ermənistana sülh müqaviləsi imzalamağı təklif etdiyini xatırladıb: “Ərazi iddialarından əl çəkilməli, sərhədlərin delimitasiya və demarkasiyası həyata keçirilməli, kommunikasiyalar açılmalıdır. Azərbaycanda siyasi partiyalar bununla razıdır, Ermənistanda da siyasi partiyaların da buna razı olacağına ümid edirik. Azərbaycan regiona sülh gətirmək niyyətindədir”.

Vahid Rusiya Partiyasının Baş katibinin müavini Andrey Klimov tədbirin təşkilinə görə Azərbaycana təşəkkür edib, ICAPP-ın qəbul etdiyi sənədlərdəki prinsiplərin yerinə yetirilməsini vacib sayıb.

Türkiyənin hakim Ədalət və İnkişaf Partiyasının (AK Partiya) Xarici əlaqələr üzrə sədr müavini Mehmet Ceylan Azərbaycan və Ermənistan arasında sülh sazişinin ərazi bütövlüyü əsasında imzalanacağına əmin olduğunu və regionda davamlı sülh və sabitliyin təmini üçün tarixi bir şərait yarandığını vurğulayıb. Onun sözlərinə görə, Türkiyə-Azərbaycan həmrəyliyi bu gün hər zamankından daha güclüdür, Şuşa Bəyannaməsini imzalamaqla münasibətlər ən yüksək səviyyəyə çatıb.

Azərbaycanın torpaqlarını işğaldan azad etdiyini söyləyən YAP İdarə Heyətinin üzvü Aynur Sofiyeva nəzərə çatdırıb ki, müharibə bitəndən sonra da Azərbaycan vətəndaşları mina problemindən əziyyət çəkib: “Azərbaycan ərazilərinin minalardan təmizlənməsi üçün 30 il və 25 milyard dollar lazımdır. İnanıram ki, konfransda iştirak edən partiyalar günümüzün aktual problemlərinin həllinə mühüm töhfə verəcək. Azərbaycan da qlobal təhlükəsizliyə töhfə verməklə siyasətini həyata keçirəcək”.

Asiya Siyasi Partiyaları Beynəlxalq Konfransının (ICAPP) Baş katibi Ço Byunq-cae bildirib ki, Azərbaycan Prezidenti İlham Əliyev konfransa çox mühüm mesajlar göndərib. O, qonaqpərvərliyə görə təşəkkürünü çatdırıb.

Daha sonra Ço Byunq-cae konfransın bəyanatı barədə məlumat verib. Bəyanatda qeyd edilib ki, konfransda regional və qlobal təhlükəsizlik müzakirə olunub: “Qlobal təhlükəsizliyin təmini üçün siyasi partiyaların imkanından istifadə olunması vacibdir. Siyasi partiyalar müxtəlif ölkələri və cəmiyyətləri, tolerantlığı təmsil edir. İdeoloji fərqlərə rəğmən, bütün partiyaların təhlükəsizlik, sabitlik və əməkdaşlıq kimi ümumi dəyərləri var. Qlobal təhlükəsizliyi təmin etmək üçün siyasi partiyalar arasında əməkdaşlığı keçirmək, mütəmadi görüşlərin keçirilməsi önəmlidir”.

Bəyanatda vurğulanıb ki, Azərbaycan, Ermənistan və Rusiya liderləri arasında 10 noyabr 2020-ci ildə imzalanmış üçtərəfli bəyanat Azərbaycan və Ermənistan arasında, Cənubi Qafqazda sülh və təhlükəsizlik üçün geniş imkanlar yaradıb: “Eyni zamanda, üçtərəfli bəyanat regionda davamlı təhlükəsizlik üçün zəmin yaradır”.

YAP sədrinin müavini Əli Əhmədov çıxışında ICAPP-ın bundan sonra da Asiyada sülh və təhlükəsizliyə böyük töhfə verəcəyinə əmin olduğunu vurğulayıb: “Asiya Təhlükəsizlik Konfransının yaradılması təşəbbüsü ilə çıxış edə, 1-2 ildən bir təhlükəsizliklə bağlı konfranslar keçirilə bilər”.

Əli Əhmədov Azərbaycanın torpaqlarını işğaldan azad etməsini də qlobal təhlükəsizliyə bir töhfə kimi qiymətləndirib.